COVID-19. Ita totu fait (e no fait) a fai in custas diis de festa

31/12/2020

Su “Decretu-lei de Paschixedda” de su 18 de su mesi de nadali at partziu, sena de fai diferèntzia geogràfica peruna, sa simana chi movit de su 24 de nadali de ocannu a su 6 de gennàrgiu de su 2021 in diis chi - po segai in curtzu - ddis naraus de colori arrùbiu e in diis in colori de aràngiu. Bolit nai ca, segundu su colori, in custas diis funt permìtias/proibidas in totu Itàlia is cosas prevididas me in is zonas arrùbias e in cussas de colori de aràngiu.

Is diis in colori arrùbiu funt is diis de festa e su èspuru de is diis de festa, est a nai su 24, 25, 26, 27 e 31 de nadali, a prus de s’1, 2, 3, 5 e 6 de gennàrgiu de su 2021.

Is àteras diis funt invècias in colori de aràngiu, duncas su 28, su 29, su 30 de nadali e su 4 de gennàrgiu de su 2021.

Arrègulas po is diis in colori arrùbiu:

Po su chi pertocat is transiduras de unu logu a un’àteru, depeus essi capatzus de cumproai ca si seus transius po apretu, po chistionis de saludi o po chistionis de traballu. In s’autodecraratzioni chi s’ant a fai cumpilai is fortzas de pulitzia statalis o localis depeus scriri su poita megaus de si transiri e, si unu decrarat su farsu, fait unu reatu.

Podeus bessiri po atendi e agiudai a unu parenti o a un’amigu chi non funt autosufitzientis.

Podeus bessiri fintzas po andai a abisitai o po ndi pigai a unu fillu minorenni de domu de s’àteru genitori.

Una cosa de impoirtu po is pipius e is piciocheddus: si su babbu e sa mamma traballant, fait a nci ddus portai a domu de is ajajus o a nci passai una pariga de oras cun issus, in domu insoru. Però no est una cosa chi si consillaus de fai, poita ca is antzianus - o comenti si siat is personis intradas in edadi - funt intra de is prus in arriscu de ndi piscai sa Covid-19 a manera prus gravi. Est mellus, duncas, chi is pipius e is piciocheddus in custas diis no abitint a is ajajus. Est mellus chi si nd’abarrint in domu.

Non si podint fai abisitas a is presoneris.

Totu cussus chi funt in corantena o in isulamentu non podint bessiri de domu, francu po fai averiguaduras dianniòsticas arretzetadas de su dotori.

Is chi presentant sinnus de arresfriu o chi portant sa callentura prus arta de 37,5° non podint bessiri de domu.

Non podeus bessiri foras de su comunu innui biveus, francu po fai sa spesa, si in su comunu nostu non ddoi at butegas chi bendint is cosas chi si serbint.

Fait a bessiri de domu po andai a crèsia (a sa crèsia prus acanta, si cumprendit!); fait a bessiri po nci fuliai s’àliga, po bogai is animalis a fai is abisòngius insoru.

Podeus bessiri po si fai una passillada e po fai sport, bastit chi siat unu sport individuali, sena de atùmbidus cun àteras personis e sena de fai atropèllius de genti. Podeus bessiri fintzas a bicicreta.

Si depeus pigai sa màchina, a costau de su ghiadori non podit setzi nemus, mentras in is setzidòrgius de palas ddoi podint setzi totu a su prus duas personis po dònnia filera de setzidòrgius. Totus depint portai sa mascheredda.

Fait a bessiri po si contivigiai s’ortu o àterus cultivus.

Non fait a andai a cassa o a piscai.

Arregordaus ca sa cosa de importu est sèmpiri a portai sa mascheredda, a si sciacuai fatu fatu is manus o a si ddas frigai cun gel disinfetadori, a arrespetai su tretu de assumancus unu metru de is àteras personis, a non fai atropèllius de genti.

Arrègulas po is diis in colori de aràngiu:

Po su chi pertocat is transiduras de unu logu a un’àteru, de is 5 de mangianu a is 10 de noti non serbit a giustificai cussas aintru de su comunu innui teneus sa residèntzia. Po andai a àterus comunus o de is 10 de noti a is 5 de mangianu aintru de su comunu innui teneus sa residèntzia, depeus essi capatzus de cumproai ca si seus transius po apretu, po chistionis de saludi o po chistionis de traballu.

Fait a andai a is butegas, chi podint abarrai abertas totu a su prus finsas a is noioras de noti.

Non fait a andai a logu de tzilleri o de arristoranti, poita ca funt serraus (francu cussus chi aprontant cosa de papai o de bufai po nci dda pigai, bastit chi si fatzat aintru de is 10 de noti).

Aintru de sa pròpiu regioni, fait a bessiri de su comunu innui biveus - a parti po chistionis de traballu, de saludi e de apretu - sceti po atrus duus motivus:

a) una borta sceti in totu sa dii, po andai a abisitai a unu parenti o a un’amigu totu a su prus in duus (sena de contai is piciocheddus chi tenint prus pagu de 14 annus e is personis disàbilis e non autosufitzientis);

b) fait a andai a un’àteru comunu, bastit chi non propassit is 5.000 bividoris e bastit chi non siat a prus de 30 km de tretu, finsas mancai siaus prus de duas personis. Est proibiu, però, a andai a is tzitadis cabulogu de provìntzia.

Si podit fai sport, bastit chi siat un’isport individuali, sena de atùmbidus cun àteras personis e sena de fai atropèllius de genti. Podeus bessiri a bicicreta.

De is 5 de mangianu a is 10 de noti fait a bessiri a si fai una passillada e fait a bessiri cun su cani, po is abisòngius cosa sua.

Sa cosa de importu est sèmpiri a portai sa mascheredda, a si sciacuai fatu fatu is manus o a si ddas frigai cun gel disinfetadori, a arrespetai su tretu de assumancus unu metru de is àteras personis, a non fai atropèllius de genti.

Infinis, una cosa de importu po is pipius e po is piciocheddus: si su babbu e sa mamma traballant, fait a nci ddus portai a domu de is ajajus o a nci passai una pariga de oras cun issus, in domu insoru? Eja, gei fait, però no est una cosa chi si consillaus de fai, poita ca is antzianus - o comenti si siat is personis intradas in edadi - funt intra de is prus in arriscu de ndi piscai sa Covid-19 a manera prus gravi. Est mellus, duncas, chi is pipius e is piciocheddus in custas diis no abitint a is ajajus. Est mellus chi si nd’abarrint in domu.

Cun su Sars-CoV-2, finsas a candu no eus a essi totus vacinaus e finsas a candu sa scièntzia no at a agatai una cura profetosa po ndi sanai, no est cosa de brullai: de su cumentzu de sa pandemia, in Sardìnnia sceti eus contau 743 mortus e oindii teneus 496 malàidus arricoveraus in logu de spidali in repartus de cura no intensiva, 44 arricoveraus in terapia intensiva e 15.785 personis in isulamentu in domu insoru (datus ufitzialis de s’Unidadi de crisi regionali de su 30 de nadali). Arregordendi unu dìciu sardu bellu, po sa Covid-19 podeus nai ca “est mellus a timi chi no a provai”. Cun sa spera chi su 2021 siat mellus de s’annu chi megat de nci bessiri! Orabonas e augùrius bellus a totus! (a.i.g.)

 

Custu est su liòngiu a sa pàgina Internet de su Guvernu innui si ddoi agatant totu is inditus in contu de ita fait/non fait a fai:

http://www.governo.it/it/faq-natale

In artu, a manu dereta, si podint ligi o scarrigai is decretus-lei e su DPCM de su Presidenti de su Consillu de is Ministrus.